Шығыс аймақ іріктеу жарысының алғашқы күні

ҚР Мәдениет және спорт министрлігінің ұйымдастыруымен, бүгін, Астанадағы «Қазанат» атшабарында «Ұлы Дала рухы» ұлттық спорт түрлері фестивалінің шығыс аймақтық іріктеу сындары өтті. ШҚО, Павлодар, Қарағанды, Алматы облысының спортшылары теңге ілу мен жамбы атудан сыңға түсті. «Қазанат» атшабарына жиналған жұртшылық алдымен шабандоздық өнерді тамашалады. Ат үстінде шеберлік әдістерін көрсетіп, шабандоздар көрермен қошеметіне бөленді. Теңге ілу сайысында бірінші орынды Қарағанды облысының командасы алса, екінші орынды Павлодарлықтар иеленді, үздік үштікті Алматы облысының жігіттері түйіндеді. Жамбы атудан бірінші орын - ШҚО командасының еншісінде. Екінші орын Қарағандылықтарға бұйырса, үшінші орынды - Алматы облысы иеленді. Бірінші орын алған командалар фестивальдің екінші кезеңі финалдық ойындарда өнер көрсетеді. Асық ату, тоғызқұмалақ, көкпар, қазақ күресі бойынша іріктеу сындары Павлодар қаласында ұйымдастырылады. Сонымен қатар, ертең «Қазанат» атшабарында сағ 15.00-де аударыспақ бойынша іріктеу жарыстары өтеді.