Асау ат үйрету

Қазанат атшабарында Қазақстан Республикасының Мәдениет және спорт министрлігі Спорт және дене шынықтыру істері комитетінің “Ұлттық және ат спорты түрлері орталығы” РМҚК-нің ұйымдастыруымен “EXPO-2017” көрмесі аясында маусымның 18 жұлдызы күні сағат 11.00-де халыққа асау үйретуден көрсетім болып өтті. Көрсетімнің басты мақсаты халыққа асау үйретудің қыр-сырымен, әдіс-тәсілдерімен таныстыру. Асау үйрету – жүген, құрық тимеген, қолда ұсталынбаған асау жылқыны жүгендеуге, мінуге үйрету.

Асау үйретуде, алдымен, үйретуге тиісті асау атты шалма салу арқылы немесе құрықтап ашық алаңға алып шығады. Асауға шабандоз ер-тоқымсыз мініп алып, қысқа уақытта өз ырқына көндіруі тиіс. Осы орайда шабандоздар өздерінің ептілігі мен ерлігін тамашалауға келген жұрт алдында кереметтей деңгейде көрсете білді.